كيف تزيد مستويات التستوستيرون لاكثر من الضعف
بسم الله الرحمن الرحيم والصلاة والسلام على اشرف المرسلين سيدنا محمد(صلى
الله عليه وسلم) وعلى اله وصحبه اجمعين.. اما بعد فارحب بكم جميعا ايها
الاخوه الاعزاء انا النهارده اول مره اكتب موضوع فيارب يعجبكم ومش معنى ان
انا مبتدئ ابقى مش بفهم او فهمى على قدى فياريت يا جماعه تقرئو الموضوع
وتقولوا رائيكم فيه بصراحه انا مش مجرد جايبلكم معلومات علميه وبس لا نا
قلبت النت ده مواقع عربى واجنبى طبيه وكمال اجسام عشان اجيبلكم موضوع انا
بقالى اكتر من 6 شهور ببحث فيه واجرب على نفسى فحبيت اوفر عليكم كل الجهد
واجبلكم المختصر المفيد.....معلش سامحونى على الرغى ده انا بس عايزكم
تطمنوا مش اكتر.
بسم الله نبدأ:-
1-زيادة نسبة الزنك المتناوله فى النظام الغذائى اليومى طب موجود فى
ايه
السبانخ-المحار-الماكولات البحريه-البيض-اللبن-اللحوم ولا سيما
الحمراء-الحبوب الكامله-القمح-نخالة الذره-السمسم-السودانى-الجبنه-كبدة
البقر-المكسرات.
طب يا عم ما احنا بناكل الحاجات دى عادى
اقولك لا استنى كل اللى فوق ده فيه زنك اه بس بنسب لا تكفى الاحتياج اليومى
الدراسات اثبتت ان من اكتر العناصر اللى الناس مقصره فى تناولها الزنك
لانه موجود بنسبه كبيره بس فى المحار وبنسب معقوله فى اللحوم
طب الحل ايه
الحل انك تعمل زى انا مابعمل تجيب اقراص زنك من الصيدليه وافضلهم واشهرهم
zmaوده غالى شويه
بس فى حاجات رخيصه كويسه برده زى فيتا زينك ده مصرى من شركة ايبيكو والعلبه
ب5 الا ربع اركز على 5 الا ربع دى عشان ماحدش يضحك عيه فى الربع ويدفع 5
وانا عن نفسى جربته وفعلا ممتاز وبيحل مشكلة العقم سامحونى بس على الحته دى
انا قولت ده وقتها بالمره طب ليه لان الزنك مع فيتامين أ مع فيتامين ه
بيكون الحيوانات المنويه ولو جربته هتلاقى نفسك حتحتلم كتييييير واقول
فايده للزنك الزنك بيقلل من عمل انزيم الاروماتيز وبالتالى يقل عندك نسبة
التستوستيرون(هرمون ذكوره) المتحول الى استروجين(هرمون انوثه) وبيفيد فى
تضخيم العضلات. تجربتى الشخصيه:- الصراحه جربت مكملات الزنك فعلا دورها قوى
بالذات فى موضوع الحيوانات المنويه.
2-فيتامين أ لانه بيعزز الجهاز التناسلى فى الرجل والمراه وله دور جيد فى
افراز التستوستيرون فى الرجال-فيتامين ب6-ب12 ودول مهمين للجهاز العصبى
المركزى وهو المسئول عن افراز هرمونات الهيبوثلاميس(منطقة تحت المهاد فى
المخ)واللى بدورها بتحفز الغده النخاميه فى الافراج عن الهرمونات المنشطه
للغدد الاخرى ومنها الهرمون اللوتينى(يحفز الخصيتين لانتاج هرمون
الذكوره)معلش يا جماعه لو كنت فصلت فيها شويه فى ناس بتحب التفاصيل العلميه
دى-فيتامين ج وله دور فى انتاج الستيرويدات(الهرمونات الدسمه) مثل
التستوستيرون والاستروجين والبروجستيرون بس اخر هرمونين دول بتوع الانوثه
مش هيزيدو عند الراجل من الفيتامين محدش يخاف يعنى-وايضا البوتاسيوم
والماغنسيوم كلها عناصر اساسيه لصنع الهرمون وزيادة تحرره
..تجربتى الشخصيه:-مواد جيده وليها نتيجه مع الوقت.
3-الثوم لاحتوائه على مواد فعاله مثل الاليسين وده بيزود تدفق الدم للاجهزه
التناسليه وبيزيد افراز التستوستيرون.تجربتى الشخصيه:-تاثيره معقول مش
بطال برده وانا كنت باخد 3-5 فصوص بس المشكله الطعم والريحه.
4-البروكلى او القرنبيط والفرق ان البروكلى لونه اخضر ولكنه شبه القرنبيط
المهم يعنى ده بقى ممتاز والله..... ليه لاحتواءه على مواد فعاله
مثل:كربيتول واندول وهذه المواد تضرب عصفورين بحجر ههههه ازاى انا اقولك
الاتنين دول بيقللو الاستروجين وبيزيدو من افراز التستوستيرون وده يخلى
الرجل اكثر خشونه واكثر عضلات.تجربتى الشخصيه:-قوى وفعال وسريع المفعول بس
مش تاكلى حتة قرنبيط صغيره وتقول مابيعملش حاجه لا كل طبق مليان وياريت
يكون مطبوخ عشان متحمرهوش فى الزيت لان معظم الزيوت بيبقى فيها صويا تحتوى
على مركبات تسمى فيتواستروجينيز ودى تشبه هرمون الانوثه فى الانسان وتودى
وظيفته لقدرتها على الارتباط بمستقبلات الاستروجين وكله مرتين تلاته فى
الاسبوع مثلا.
5-النوم الجيد وانا بعتبر دى اكتر واحده محدش ممكن يعملها كويس كله بيسهر
للساعه اتنين وتلاته وينام(طب كمل وانزل صلى الفجر) يا جماعه النوم رحمه من
ربنا للانسان وصدق الله اذ يقول(وجعلنا الليل لباسا وجعلنا النهار
معاشا)العلماء جابو شوية بنى ادمين وخلوهم ميناموش فترات كافيه وجدو ان
خلال عدة ايام انخفض هرمون الذكوره بنسبة 40%دى مصيبه والله وانا ذات نفسى
قعدت مده منامش غير ساعتين تلاته فى اليوم جالى قلق وتوتر وصوتى نعم وكرهت
الدنيا كلها احسن حاجه انك تنام الساعه 10 يلا مارضتش اقول 9 عشان محدش
يتنرفز النوم 8-9 ساعات متواصل يزود انتاج التستوستيرون وهرمون النمو ومعظم
الهرمونات ما عدا هرمونات القلق والتوتر بتقل حتى جرب لما بتنام ليله
مريحه كده بتصحى بتلاقى صوتك ما شاء الله محدش عايز يسمعه صح ولا انا غلطان
علما بان هرمون الذكوره اعلى 30%عند الاستيقاظ.تجربتى الشخصيه:-اهم نقطه
تقريبا ديه لان مش بس هتزود لا دى هتمنع الواحد انه يقل عنده التستوستيرون.
6-الهدوء النفسى والسكينه لان الهدوء النفسى بيخلى الهرمونات
البناءه(التستوستيرون-هرمون النمو-dhea ودى اختصار كلمة داى هيدرو ايبى
اندروستيرون وده بيتفرز من الغدد الكظريه وقد يفوق التستوستيرون فى البناء
وهو اصلا بيتحول بفعل بعض الانزيمات الى تستوستيرون واستروجين وبكده يبقى
بروهرمون لكن محدش يخده ده ضرره زى المنشطات بالظبط وبرده العصبيه والقلق
بيخلى الكورتيزول يتفرز فيمنع افراز التستوستيرون وهرمونات اخرى ويسبب
امراض ومشاكل صحيه على المدى البعيدمثل(السكر-الضغط-القلب-ضعف العضلات ودى
على المدى القريب-ضعف العظام-ضعف بصيلات الشعر-ضيق التنفس والام الصدر ودى
على المدى القريب برده).تجربتى الشخصيه:-والله مش عارف اقولكم ايه انا نقطة
الهدوء صعبه اوى انى احققها لكن لما بهدى شويه كده التستوستيرون بيزيد طب
يتعرف منين فى علامات زى كبر حجم الخصيتين وزيادةوزنهم وخشونة الصوت وزيادة
الشهوه والشهيه للطعام.
7-الكوليسترول ايه بتقول ايه يا عم
ايوه الكوليسترول طب انت عارف هرمون الذكوره مكون من ايه اقولك تعريفه
وهاتعرف القصه دى هرمون التستوستيرون:-هو هرمون ذكرى ستيرويدى(دسم)مشتق من
الكوليسترول وهومن مجموع الاندروجين(الهرمونات الذكريه)ويتحول فى الانسجه
الطرفيه الى داى هيدرو تستوستيرون (dht)
والهرمون ده انشط من التستوستيرون 3-4 مرات وهو المسئول عن كبر البروستاتا
ونمو الشعر وخشونة الصوت والصلع على النمط الذكورى(حسب استعدادك الوراثى)
طيب نلاقى الكوليسترول ده فين افضل حاجه تاكل بيض بصفاره(مصدر
الكوليسترول)طب الناس حتقولك يا عم ده كوليسترول انت هاتضرنا ليه
لا ابدا والله العلماء كانو يعتقدون ان الكوليسترول الموجود فى الصفار مضر
لكن اكتشفو انه كوليسترول نقى واضرار الكوليسترول بسبب الدهون وتعب الكبد
مش الصفار عشان كده كل صفارتين او ممكن تلاته الصراحه الاضمن اتنين طبعا
العلماء كل شويه برده يكتشفو حاجات جديده والاهم انك تاكله فى الفطار عشان
تلحق اعلى نسبة تستوستيرون موجوده فى جسمك من الانخفاض الشديد وبكده هيكون
فى نتايج احسن وبرده الذكاء حلو اجمع الكام نقطه اللى مكتوبين فى الموضوع
ده مع بعض على قد ما تقدر وكل ما هاتلتزم كل ما هتلاقى نتايج باهره يعنى
مثلا نام كويس وهدى نفسك وكل فى الفطار بيضتين بصفارهم هاه مش ترمى الصفار
وتاكلى البياض الكوليسترول فى الصفار مش البياض ومعلومه على السريع الصفاره
فيها 2جرام بروتين والبياض 4جرام بروتين
وكمان مع البيض ثوم وزنك وفى الغدا قرنبيط ايه الحلاوه دى كدا ميه ميه بس
كمل الموضوع الرزل ده معلش وهاتستفيد جامد فى مفاجاه تحت على فكره والله
انت حر.تجربتى الشخصيه:-طبعا ده من المواد الخام اللى بيصنع ويشتق منها
هرمون الذكوره فاكيد هى الاصل طبعا.
8-الدهون بالذات الغير مشبعه الاحاديه لانها لها تاثير فورى على الخصيتين
مثل:-(السودانى وده ارخصهم وافضلهم-باقى المكسرات)لازم 30%من سعراتك
الحراريه تكون من الدهون مش 30%من اكلك فى فرق لان جرام البروتين=4سعرات
حراريه-جرام الكبروهيدرات=4سعرات حراريه-جرام الدهون=9سعرات حراريه
اوباششش
فهمت.تجربتى الشخصيه:-انا الصراحه مش باكل دهون كتير لكن موضوع السودانى
بالذات قبل النوم(فى العشاء يعنى) مفعوله كويس جدا بس مش تجيبلى بنص سودانى
من خيرى بتاع اللب وتقولى مابيعملش حاجه ماهو لازم هاتلك حبه محترمين ب2
جنيه مثلا وكل ماتخافش مش هيضرك.
9-الامداد المستمر من السعرات ودى يا جماعه رهيبه ونتايجها ملحوظه جامد
يعنى بدل ما تاكل 3وجبات خليهم 6 بس قلل الكميه فى كل وجبه للنص مثلا عشان
الهضم وكده يعنى وعشان ماتفطس وتموت هههههه والعلماء جابوا افراد وعملو
عليهم الدراسه دى وفعلا اثارت ضجه فى مستويات التستوستيرون وهرمون النمو
الفكره انك لما بتقعد بالخمس ست ساعات جسمك محتاج طاقه هايجيبها منين
هيشحتها يعنى فيضطر يقلل الحرق فيوطى شويه بشويه الثيروكسين(هرمون الغده
الدرقيه)والتستوستيرون(حبيب الرجاله)وفى الاخر لو ماعملتش كده مش هاتعرف
تعليه لمستويات كبيره.تجربتى الشخصيه:-تاثير والله ممتاز وسريع بس برده كل
فرد مختلف عن التانى يعنى فى واحد اصلا هرمون الذكوره عنده نسبته مثلا 100%
ده طبعا لما يطبق الكلام ده نتيجته هتكون غير واحد هرمون الذكوره
عنده150%ولا ايه وقصدى بالنسبه دى نسبه طبيعيه وفوق الطبيعيه.
10-السعاده يعنى تقعد تضحك وتتبسط هههههههه يلا اضحك معايا ليه بقى فى
هرمون بيتفرز من الغده النخاميه اسمه الاندروفين وده بيفرز لما تبقى فى
حالة سعاده او غياب عن الواقع(نايم مثلا)وده تاثيره ضعيف شويه لكن ماتفوتش
حاجه برده خليك واعى ده حتى الضحك ببلاش وعلى راى المثل(ابو بلاش كتر منه
وابو فلوس ابعد عنه)وتاثيره غير مباشر على رفع التستوستيرون.تجربتى
الشخصيه:-هههههههههه.
11-الثقه بالنفس او ممكن حتى الوهم يا عم بتقول ايه معلش ركزو معايا شويه
النقطه دى بتاعتى مش انا اللى مالفها لا ابدا والله اقصد بتاعتى يعنى بعرف
استعملها ولله الحمد انت تصدق ان العلماء جابو فريقين فريق ادوله اقراص
فيها بورون واقراص لاتحتوى شى بالمره وقاللوهم الحاجات دى بتزود هرمون
الذكوره وبعد عدة اسابيع الهرمون ارتفع بشكل كبير فى كلا الفريقين بنفس
النسبه تقريبا لمن فريق معدن البورون كان اكتر حاجه بسيطه اوى وكمان انت
اوهم نفسك انا لما اكل كذا ولا اعمل كذا هابقى وحش وان شاء الله هاتجيب
نتيجه واضحه وقويه.تجربتى الشخصيه دى تعتبر مع النقط الاساسيه
(النوم-الكوليسترول-الزنك)احسن حاجه حسيت انها بتزودلى الهرمون.
12-واخيرا الهديه اهم عشبتين اى حد يقدر يجيبهم:-
1-الزنجبيل او بالبلدى يعنى الجنزبيل ده بقى اشربه لوحده من غير سكر هاتلك
معلقه او معلقه ونص(المعلقه مليانه مش ممسوحه)حسب قدرتك حط فى كوب فارغ
معلقه ونص مثلا وده اللى كنت باعمله لكن طعمه نارررر حبتين وحط معلقه الى
اتنين سكر وماتكترش لان السكريات بتوطى التستوستيرون وفى تجربه العلماء
عملوها لما الرجاله بيروحوا يعملو تحليل سكر قبليها بيبقو واخدين كمية سكر
كبيره وجدو انها خفضت التستوستيرون بنسبة25%ثم عاد ببطئ خلال عدة ساعات
المهم خلينا فى الجنزبيل وماتغليش الجنزبيل عشان تاثير المواد الفعاله
مايروحش اغلى الماء لوحده وبعدين صبو على الزنجبيل وقلب انت محتاج حوالى
2-3اكواب عشان تلاقى نتيجه جيده والعلماء جابو فيران(اللى ينفع مع الفار
ينفع مع الانسان)وقسموهم لمجموعتين واحده ادوها 50جرام لكل كيلو جرام
والتانيه ادوها 100جرام لكل كيلو جرام والنتيجه المجموعه الاولى زاد على
اللى موجود بنسبة 60% والمجموعه التانيه زاد بنسبة 110% على اللى موجود
اصلا يعنى 160%و210% وكل ده خلال عشرين يوم بس وعلى فكره انت 10%بس يفرقو
معاك فى بناء العضلات والقوه واللياقه وبرده الهرمون اللوتينى زاد فى
المجموعه الاولى بنسبة10% وفى التانيه بنسبة65%وده خبر حلو لاخوانا اللى
بيضربو منشطات يشربو جنزبيل مع كورسات التنضيف هاه مش جنزبيل بس وهيفيد فى
رجوع الافراز الطبيعى للهرمون.تجربتى الشخصيه:-انا خلال فتره تقرب من 7
ايام فقط حسيت انى انشط واقوى واكثر عدائيه وخشونة الصوت زادت جامد ماشاء
الله بس لى ملحوظه برده السن بيفرق يعنى احسن وقت يزيد معاك بين 16-30وبعد
كده النتايج هتكون ابطا فبالله عليكم جربو كل ده بلاش منشطات ونرجع نندم
ونقول يا ريت اللى جرى ما كان.
2-البصل ودى هديه احسن بكتير ياراجل بجد والله وعلى فكره البصل ده اقوى
نقطه فى كل الحوار ده وحطيته فى الاخر عشان اللى هايكمل الموضوع يستاهل
الهديتين دول(الجنزبيل والبصل)يا جماعه نرجع لاخوانا العلماء والفيران
بتاعتهم ديه العلماء برده جابو فيران وقسموهم قسمين الاول ادولو نص جرام
عصير بصل لكل كيلو من وزن الجسم والمجموعه التانيه ادولها جرام لكل كيلو
جرام من وزن الجسم وبعد عشرين يوم
المجموعه الاولى زاد التستوستيرون عندهم بنسبة 250%والتانيه بنسبة 400%يا
جماعه بعد عشرين يوم لكن دى فيران الله اعلم البشر بقى هايعملهم ايه لكن
اكيد فى نتيجه جامده ان شاء الله زى مالجنزبيل جاب نتيجه للفيران والبشر
البصل برده ان شاء الله هيكون زيه ده لو حصل كده والله كانك بتاخد منشطات
بس بقى تعايش مع الصوت الغليظ والعنف وممكن تصلع لو استعدادك الوراثى كده
وكل ده نتيجة ارتفاع التستوستيرون الطبيعى .
$$$$اخر حاجه ابعدو عن الفيتواستروجينيز(استروجين نباتى مماثل لاستروجين
الانسان)وده هتلاقوه فى (السمسم-الكتان(ده بالذات مصيبه هو والزيت بتاعه
وتقريبا الزيت الحار زيت كتان ياريت اللى يعرف يقول عشان كلنا نستفاد)-فول
الصويا وجميع الكلمات اللى فيها صويا-عرق السوس-اليانسون-القهوه-الحليبه
فيها برولاكتين وده هرمون ادرار الحليب-الحمص-النعناع-العطور بجميع انواعها
فيها الماده المذكوره وايضا المبيدات الحشريه ومعطرات الجو-البقدونس-العدس
قلل منه شويه لو بتاكله كل يوم يعنى).
*********واخيرا يا جماعه الموضوع خلص هو كلفنى وقت ومجهود بس كله يهون
عشانكو والله وعشان اى يحد عايز يستفيد بجد واى نقد انا هاقبله بصدر رحب
والموضوع مش منقول ولا حاجه انا اللى كاتبه بايدى بعد جمعه من كثير من
المواقع العربيه والاجنبيه وجربته على نفسى وياريت تقولولى رايكم بامانه
عشان اتشجع ولو لقيت حاجه كويسه اكتب فيها برده والسلام عليكم ورحمة الله
وبركاته........
