اهم اشاعات و افتكاسات و خرافات كمال الاجسام ( الجزء الثانى )

اخوانى اعضاء و زوار منتدى كمال الاجسام

الاشاعات مفيش اكثر منها و فى موضوعى الاول ذكرت اهمها و مع ذلك بتبقى الكثير و مهم ايضا

هستكمل باقى الموضوع اللى فات .. و اللى مقرأهوش او حابب يقراه تانى اللينك اهو

بسم الله الرحمن الرحيم

ده اول موضوع لية فى قسم الاستفسارات و ان شاء الله يعجبكوا اوى و يفيدكوا

موضوعى عن ( خرافات و افتكاسات كمال الاجسام )

اكيد كلنا بنواجه الموضوع ده ... كل واحد تسألوا يقولك اعمل كذا و اوعى تقرب من كذا و العب معرفش ايه و العب التمرينة ديه و لازم تلعب كل التمارين للعضلة و انت بكدة يتتوه المبتدىء اللى جى يسألك او ممكن كمان تتوه واحد قديم و تحيره ب 40 رأى من كل واحد شكل و طبعا مش عارف يسمع كلام مين ولا مين يقوم سايب اللعبة فى اقل من شهر

هات بقى شوية فشار او كيس شيبسى و اقرى يا معلم الافتكاسات الكتيرة اللى ملهاش اى لازمة

1- و من اكبر الافتكاسات ( اتمرن زى البطل عشان تبقى بطل )

الكلام اللى موجود فى المجلات الكتير و اللى الكابتن بتاعك يقولهولك او واحد قديم فى الجيم مثلا انك تلعب كل يوم و متريحش خالص عشان العضلة تزيد و تكبر ده كله كدب فى كدب و تحوير عشان يبيعوا منتجاتهم بس
انت لما تخشلى تمرينة بنش مثلا و تروح لاعب زى ما قالولك بنش عالى بار و دمبل و تفتيح و بعدين مسطح بار و دمبل و تفتيح و مقلوب هكذا بردو و تقوم رايحلى على الاوفر و تخلص تقوم داخل باى

انت كدة بتموت نفسك يا عم و تعدلى ساعتين او 3 فى الجيم !!! ليييه بالطريقة ديه هتتسبب فى انك تتمزق او تجهد العضلة زيادة ( اوفر تراينينج ) و تقل منك و ترجع متلاقيش نتيجة فى الاخر تروح سايب اللعبة يا كبير .. نصيحة ( العب قليل و صح .. كل كتير و مفيد .. حجمك يزيد ) حلو اوى انك تلعب يوم بارات بس و يوم دامبل بس .. و هكذا .. نوع فى تمرينتك و متعودش جسمك على حاجة معينة

2- ( اتدرب لحد ما العروق تبان )

يا جماعة العرق فى العضلة بيبان لما العضلة تتحط تحت ضغط معين ده بيزود ضخ الدم فيها مش معنى ان العرق باين عندك يبقى انت كدة بتلعب صح و العضلة بتزيد .. العضلة تزيد لما تلعب بأوزان تقيلة و تتغذى كويس و تشغل الياف العضلة عن طريق الحركة الكاملة للتمرينة .. مش لما تعملى 100 عدة باى و تلاقى العرق بان عندك يبقى انت كدة واد معدى

لما دهون جسمك تقل هتلاقى عروقك كلها بانت و ساعتها تتأكد انت بتصفى الدهون مش بتزود حجمك

3- و جينا لأهم و اشهر افتكاسة فيهم كلهم ( الاعداد القليلة للضخامة و الاعداد الكتيرة للتقسيم و التشريخ )

اللى الناس فهماه انك كل ما تخفف وزن و تلعب اكتر هتشرخ و تزود وزن و تلعب اقل هتضخم و ده اكبر غلط .. يا جماعة العضلة ليها 3 حالات بس

يا اما بتزيد و تكبر يا اما زى ما هى يا اما بتقل و تنكمش

مفيش حالات غير ديه .. لو عايز تكبرها علطول غير الروتين اللى انت ماشى عليه و الوزن بتاعك يزيد دايما و تلعب صح من غير مساعدة و تلعب حركة كاملة و تغذية كويسة

عايز تخليها زى ما هى افضل اعمل الروتين اللى بتعمله دلوقتى و شغال عليه

عايز تخليها تنكمش مفيش اسهمل من كدة يا عم .. قعد فى بيتكوا و متنزلش الجيم تانى اهم اشاعات و افتكاسات و خرافات كمال الاجسام ( الجزء الثانى ) Ange

اهم اشاعات و افتكاسات و خرافات كمال الاجسام ( الجزء الثانى ) Ange

مفيش حاجة اسمها التمرين ده بيقسم و التمرين ده بيضخم .. التقسيم ناتج من حاجتين و هما عضلة نضيفة معليهاش فاتس .. و تانى حاجة هى نسبة الفاتس اللى فى جسمك تكون قليلة

الاوزان الخفيفة عمرها ما تبنى عضلات .. هى بتحرق السعرات الحرارية مش اكتر .. و لو عايز تحرقهم يبقى اجرى افيدلك او نط الحبل

4- ( السبت: بنش .. الاحد: ظهر ,,,,,, )

هو مش دستور لازم تمشى عليه .. انت لو عايز تزيد يبقى لازم تنوع فى الروتين بتاعك .. الروتين ميقعدش معاك اكتر من شهرين او اقل كمان
بس خد بالك و انت بتغير الروتين عشان متجهدش نفسك و العضلة على الفاضى

مع العلم ان العضلة بتزيد فى الراحة مش فى الجيم .. ريح اكتر تزيد اكتر .. ممكن تلعب 3/4 ايام و تريح الباقى .. متلعبش العضلة كل يوم عشان تزيد معاك .. كدة لو اتنطت عمرها ما هتزيد .. مرة واحدة فى الاسبوع لكل عضلة حلو اوى

5- ( فاجىء العضلة و خليها تخمن انت عايز ايه )

هههههههههه .. ديه اكتر واحدة مضحكة فعلا .. تروح للكابتن يقولك لازم تفاجىء العضلة بتاعتك .. حزر فزر يعنى

هى النظرية فعلا صح .. لكن طريقة تنفيزها بتتم غلط خالص .. العضلة معندهاش عينين عشان تشوف انت الاول كت بتلعب بالبار و بعد كدة عملت نفس الحركة بس بالدمبل .. لا لا كدة لازم ازيد بقى ههههههههههه

مفاجأة العضلة مش بنفس التمرين بأداة مختلفة و لكن بحركة مختلفة كمان .. العضلة بتفهم الحركة مش التمرينة
عايز تفاجىء عضلتك يبقى مثلا بدل ما كت بتلعب علطول تجميع دمبل .. العب تفتيح .. كدة العضلة تزيد معاك .. و زى ما قلت قبل كدة غير الروتين دايما و متسبتش على حاجة

6- ( كل ما تطول فى الجيم و فى تمرينتك كل ما تزيد اكتر )

و ده اكبر غلط كتير من الناس بتعملوا و حتى الناس القديمة فى اللعبة بالطريقة ديه بيجهدوا نفسهم و عضلتهم فى ناس بتبقى نايمة فى الجيم و صبح و ليل و تعد 4 ساعات تلعب

ياجماعة هرجع و اقول تانى اللى بيزود العضلة ( تغذية سليمة .. فترة راحة مناسبة .. تمرينة ذكية ) .. اخرك فى الجيم ساعة او ساعة و ربع لو انت مفترى .. اكتر من كدة انت بتهد العضلة مش بتبنى اى حاجة و بتتعب نفسك على الفاضى و المليان ولا هتحس بأى فرق

7- ( وجع العضلة دليل على نموها و زيادتها )

بردو ناس كتير تقولك لو محستش ان العضلة وجعاك يبقى انت مبتزدش و لو حسيت كدة تانى يوم اتأكد انها بتكبر

ده كلام ولا ليه اى لزمة .. العضلة تعرف انها زادت لما تلاقي نفسك بتشيل اوزان اتقل .. بتعلب اعداد اعلى .. حجمك بيزيد تبع القياسات و ميزانك بيزيد

8- ( شرب المكملات فى ايام الراحة بيديك دهون )

لما تشرب المكمل بتاعك لو كان بروتين فى ايام الراحة عمره ما هيديك دهون بالعكس ده بيساعد جدا فى عملية شفاء العضلة و بيخلنى نسبة النيتروجين و الاحماض الامينية فى جسمك متساوية .. بالتالى هتحس بفرق فى التمرين

9- ( اى حاجة المحترفين بيعملوها ( روونى/جاى ) يبقى انا كمان هعملها و هتجيب نتيجة )

اكبر غلط ممكن تعمله فى حياتك انك تتمرن زى واحد من المحترفين اللى متعرفوش يا معلم ان المحترف ممكن يكون بيجهد نفسه فى الجيم ( اوفر تراينينج ) و يعد ساعات كتير يلعب و يعملك 20 مجموعة على معرفش 100 عدة .. لو عمل زيه يبقى كأنك بتنتحر و الله

يا فندم .. المحترفين كل حياتهم منشطات فى منشطات .. فا مهما عملوا فى الجيم مش مهم لأنه كدا كدا حجمه بيزيد من غير دهون حتى لو بيلعب غلط

10- ( كل اى حاجة و متخفش مدام بتتمرن )

بردو تروح الجيم تقول للكابتن انا باكل كل حاجة بس عايز اربى عضلات هيقولك ماشى مش مهم ايدك على فلوس الاشتراك .. يا جميل اللعبة ديه تغذية و راحة .. لو مظبطش اكلك و مشيت على نظام غذائى كويس ملائم ليك يبقى ولا ليه اى لازمة اللى بتعمله .. انت عايز تفهمنى انك اول ما تخلص تمرينة رهيبة تروح البيت تضربلك 4 سندوتشات برجر ولا فراخ محمرة .. يا عم كل ده دهون ملهاش اى لازمة .. ابوس ايدك ابعد عن المحمر و المشمر ده .. خليك فى المسلوق دايما و الخضار حلو جدا و مفيد .. مع العلم ان جسمك بيحتاج نسبة دهون بس مفيدة
ديه بتلاقيها فى سمك التونا .. مش مضرة بالجسم ديه و زيت الزيتون .. و حاجات كتير تانية

11- ( انت ممكن تبقى ضخم اد المحترفين من غير منشطات )

اهو ده الهبل بعينه .. كل واحد يخشلك الصالة بتاعته يلاقيلك كام صورة عملاقة متعلقة عال حيطة .. يقولك ياااه امتى ابقى زى دول تلاقى الكابتن فى ضهرك .. ان شاء الله بس استمر معانا بس و هتبقى قدهم بس هتاخد وقت حبتين .. واحدة واحدة تلاقيه بيجيب رجلك عشان تاخد مكمل من عنده ( اكيد مضروب ) شوية كمان يقولك بص انا هديك حقنة تخليك سوبر مان .. و ضر نفسك يا ناصح بقى

المحترفين دول بياخدوا منشطات منسابة ليهم .. لكل محترف دكتور خاص بيه و يعرف ايه انسبلوا عشان ياخدوا .. مع العلم ان تقبل الجسم للمنشطات او المكملات ديه حاجة جينية وراثية

12- ( لعب الحديد هيوقف نموك )

النقطة ديه مهمة اوى للناس الصغيرة فى السن .. تروح الصالة الكابتن يقولك متلعبش و انت واقف و علطوا خليك قاعد و معرفش اعمل ايه عشان تطول و متعملش ايه عشان متقصرش

الدراسات اثبتت انك ممكن تبتدى تلعب من سن 8 سنين .. ارنولد كان بيتمرن فى مرحلة نموه و مع ذلك نموه موقفش .. فا ده كله اشاعات

سبب بقى الاشاعات ديه مييييييييين .. معظمهم المبتدئين .. كل مبتدىء يعملك افتكاسة جديدة و تمرينة غريبة و يقولك ده الصح حتى جرب و هتحس بالعضلة شغالة .. يا عم الكبير انا لو مسكت علبة بيبسى و اعدت احركها فى الهوا العضلة هتشتغل هههههههههه

و كل مبتدىء يسمع كلمة من واحد ملوش خبرة اساسا فى اللعبة يقوم ناشرها بقى و يبقى دستور فى الصالة و بردو المجلات سبب اخر للاشاعات ديه .. عايزين يبيعوا يعملوا ايه يعنى !!!

موضوعى خلص يا جماعة .. انا عارف انا خبطت فى ناس قديمة كتير و حطمت افكار ناس جديدة .. اعتذر عن كدة
بس ديه الحقيقة .. ارجو ان محدش يزعل منى
انا زى اخوكوا .. جى انصحكوا مش اكتر .. اتمنى انى اكون افاتدكوا .. و شكرا

اشاعات و افتكاسات و خرافات كمال الاجسام ( الجزء الثانى )

13- البنش المقلوب بيسببلك العمى يا عم ابعد عنه .. بلاها التمرين ده و فيه بدائل كتير

مبدئيا البنش المقلوب مبيسببش عمى .. ولا ضخ الدم بيزيد على العين ولا اى بتنجان من اللى بيتقال
ما الناس اللى بتعلب يوجا 24 ساعة واقفين على راسهم .. كان زمانهم كلهم اتعموا
و نفرض ان ضخ الدم بيزيد ( مع انه مش صح ) عايز تفهمنى ان3 مجاميع ولا حتى 4 .. فى عدات من 6 الى 12 اخرك هو ده اللى هيعملك عمى ؟
ال 20 ثانية او اقل بتوع التمرين فى المدة الضقيلة ديه شبكية العين هتنفجر ؟ مفيش اى ابحاث علمية بتقول الكلام ده

و اللى يقولك ده بدائله كتير مثلا و العب متوازى او ايا كان غيره من التمارين
البنش المقلوب ملوش بديل سواء بار او دمبل .. و لكن .. فيه تمارين تانية بتشغل البنش المقلوب معاها بس اكيد مش بنفس تركيز البار و الدمبل !!

الخطر الوحيد من البنش المقلوب هو ( اصابة مفصل الكتف ) و ده بيحدث امتى ؟ لما تشيل وزن تقيل و تلعب غلط
يعنى يا كوتش لو لعبت بوزن تقيل صح فيه اى خطر ؟ اكيد لا طبعا
زيه زى اى تمرين لو لعبت باوزان تقيلة غلط ممكن تمزق نفسك .. بس ده الخطر ازيد شوية

14- ابنى من فوق الاول و بعدين ابنى من تحت

اول ما تخش الجيم تلاقى الكابتن بنفسه و العيال القديمة الجتت بقى تقولك ( يا عم فكك من الرجل هتعوق تقدمك دلوقتى و كدة كدة مش باينة .. ابنى من فوق الاول اللى ظاهر قدامك و بعدين نبقى نرجع للرجل .. متخفش يا عم ديه بتطلع فى يوم و ليلة )

ابسط مثال: دلوقتى لو بتبنى عمارة .. هتبنيها من فوق لتحت ؟ ولا من تحت لفوق ؟
و لو بنيتها و تحت اساسها ضعيف .. هتقع ولا لأ ؟

نفس الكلام لاعب كمال الاجسام .. هتهمل رجلك انهاردة .. هتيجى بعد كدة مش هتعرف تضخمها و هتبقى ماشى برجل كتكوت و جسم بقرة من فوق .. و ناس كتير بتشتكى من انهم رجلهم مبتزدش علشان اهملوها فى الاول

و حاجة كمان .. الناصح اللى فاكر انه هيضخم من غير ما يلعب رجل .. انســــــــــى
رجل اللعب بيزود افراز الهرمونات بصورة اكبر من اى تمرينات تانية .. يعنى لو لعبت رجل هتزيد من فوق ؟ اه طبعا هتزيد
و لو اهملتها التقدم هيبقى بطىء جدا

15- العب بار فى بداية التمرين و خلص البنش العالى الاول و بعد كدة انقل على المسطح ....... الخ

مفيش قانون بيقول لازم تخلص جزء جزء من العضلة و الا كدة مش هتستفاد
انت ممكن تخلص جزء جزء .. ممكن تشكل تلعب حاجة من هنا على حاجة من هنا .. مثلا بار علوى و بعدين دمبل مسطح فى البنش
فى كلا الحالتين انت مستفيد
و لكن .. يفضل تلعب التمارين اللى بتحتاج مجهود اكثر فى الاول .. يعنى ايه يا كوتش ؟ يعنى متضيعليش وقتك فى لعب التفتيح و البول اوفر و تيجى فى الاخر تمسك بار تلاقى الطاقة خلصت !! خليك ناصح
ابتدى بالصعب فى الاول و امثلة للتمارين ديه ( عقلة ضهر .. بار فى الصدر .. بار امامى فى الكتف )

16- تمرين القرفصاء بيكبر المؤخرة و بيخلى شكلها وحش

ناس كتير بتتجنب السكوات ( القرفصاء ) عشان خايفة لا مؤخرتها تكبر .. مع انه افيد تمارين الرجل كلها
الحقيقة ان المؤخرة كبيرة ولا صغيرة .. ده راحع للجينات الوراثية و ليس تمرين القرفصاء
و مش عيب !! .. انت بتتولد بتلاقى نفسك كدة يبقى لازم تحب نفسك على كدة
فا ايا كانت جيناتك .. متحطش فى دماغك و خش تمرينتك عادى جدا
و لو السكوات هو اللى بيكبر المؤخرة .. يبقى الجلوس و الوقوف هو كمان بيكبرها ( بما انهم نفس الحركة )
تجنب الدهون الكثيرة فى تغذيتك و هى مش هتكبر .. و الكارديو ايضا مهم جدا فى الحالة ديه

17- الابطال اللى فى اعلانات المكملات بيستعملوها عشان كدة وصلوا للحجم ده و بيشيلوا اوزان تقيلة

اللى عاوز اوضحه ان الناس ديه بيجيبوها تعمل دعاية و خلاص و ياخدوا فلوس
يعنى مش معنى ان جاى كاتلر قال ان مثلا ( ان او اكسبلود ) رائع و بيخليه يشيل 500 كيلو نصدقه
الناس ديه عملت اجسامها بالمنشطات .. و التغذية السليمة .. و التدريب المستمر على مدار السنين
و ممكن اصلا تلاقيه مبيستعملش المكمل اللى عامل ليه اعلان

فا افضل طريقة انك تعرف المنتج ده كويس ولا لأ خد رأى الناس اللى اشترته او شوف مبيعاته و الريتنج بتاعه عامل ايه .. مبتصش لصورة الحيوان اللى شايل علبة المكمل هههههههه

18- لو بطلت تدريب عضلاتك هتتحول لدهون

اكبر خطأ ممكن الواحد يصدقه .. هو مش سحر .. مفيش حاجة اسمها العضلة هتتحول لدهون او العكس .. واحد تخين داخل الجيم يقولك انا هحول دهونى لعضلات

العضلة مكونة من خلايا حية فردية و بتمر على عمليات بنائية معقدة كثيرة
و خلايا الدهون بكل بساطة عبارة عن اكياس تخزين شحوم

مستحيل ديه تتحول ل ديه او العكس .. كأنك جايب كيلو حديد و عمال تعمل عليه تعاويز عشان تحوله لدهب

لما تبطل تمرين العضلة بتتأقلم مع الظروف الجديدة و المحهود الجديد بالتالى بتنكمش
و كمان لو المجهود قل بصورة جامدة خالص .. العضلة بتنكمش اسرع مع الحلد اللى حواليها بالتالى بتلاقى عندك ترهلات

انت بتلاقى دهون بعد ما تبطل تمرين لأن اكلك زى ما هو و المفروض كنت تقلله على حسب المجهود الجديد .. بالتالى اى سعرات زيادة بتتخزن فى صورة دهون فورا و الحرق عندك بيقل

19- لو ريحت اسبوع كل اللى عملته ضاع على الفاضى

ده العكس هو اللى صحيح .. لو ريحت اسبوع هتستفيد اكثر
المفروض اصلا بعد كل جدول جديد ( شهرين او 3 شهور ) تاخد اسبوع راحة ..
اثناء الاسبوع ده لو عندك اى بداية لاصابات هتلحق تخف .. و بالتالى العضلة تستريح شوية و اول ما ترجع تكون متحمس للجيم و تلاقى نفسك بتشيل اوزان اتقل من العادى كمان

20- العضلات بتقلل سرعتك و مرونة جسمك

برده كلام حاطىء و العكس هو اللى صحيح

الدراسات اثبتت ان العضلة القوية بتنقبض و تنبسط اسرع من الضعيفة و ايضا بتدى طاقة اكثر
بالتالى السرعة هتزيد مش هتقل .. بدليل كل العدائيين ( الناس اللى بتجرى للتوضيح ههههه ) هتلاقى كلهم عضلات

و بخصوص المرونة .. الكلام صحيح لو حضرتك شايللى وزن تقيل و بتعملى نص عدة و الحركة مش كاملة .. اكيد المرونة هتلقة
بس لو بتعمل الحركة كاملة و صحيحة و بتفرد العضلة و تتنيها للاخر ايا كان الوزن اللى شايله .. ده عمره ما هيأثر على مرونتك بالسلب
بالعكس .. المرونة عندك هتزيد
و يفضل لو مضطر تلعب بوزن تقيل و الحركة مش كاملة .. لما تخلص التمرين تعمل اطالات للعضلة عشان ميأثرش على مرونتك

21- اتمرن بطن كتير عشان تقلل حجمها و تحرق الدهون و تتقسم و يبقى شكلها حلو

الحقيقة المرة ان ( البطن عضلة زيها زى غيرها ) يعنى لو كل يوم اتمرنت عليها .. مش هتقل خالص .. بالعكس ده يا اما هتضعف و تفضل سايبة زى ما هى يا اما هتزيد معاك
و تمرين البطن ملوش علاقة بحرق الدهون .. حرق الدهون ده عن طريق الكارديو و ايضا عن طريق التغذية
يعنى لازم تقلل سعراتك الحرارية اقل من اللى بتحرقه عشان تقلل حجم البطن او اي عضلة غيرها

22- ممكن تضخم و تحرق دهون فى نفس الوقت

الكلام مش صح .. و لكن اللى ممكن يعمل كدة ( واحد عنده سوبر جينات وراثية ) تلاقيه بيحرق الدهون و عضلاته بتزيد فى نفس الوقت .. و نادرا لما تلاقى حد من الناس ديه .. و كمان بيبقوا شغالين منشطات

لاغب كمال الاجسام الطبيعى ( مش سوبر مان ) لازم يضخم لحد مرحلة معينة و بعدين يبدأ يحرق دهونه لحد ام يوصل للنسبة اللى عاوزها و هكذا .. ( مرحلة البلك و الكت )

23- كل ما تعرق اكثر .. كل ما تحرق دهون اكثر

ياما سمعنا الكلام ده .. و تلاقى اللى لابسلى كيس بلاستيك و جايلى الجيم فاكر نفسه نيل ارمسترونج و هيمشى على القمر

نفصص الكلام حاجة حاجة .. العرق ناتج عن ايه ؟ .. العرق ده فقدان مياه .. و كل واحد و طبيعة جسمه
فيه اللى علطول بيحرق و حران صيف و شتاء .. و فيه اللى لو قعد يجرى شهرين مش هينزل نقطة
و حسب الجو ايه نظامه .. و التهوية و الهدوم اللى لابسها ..... الخ

و نيجى لحرق الدهون .. دلوقتى لو عاوز ( تقلل وزنك ) مش مشكلة .. البس يا عم الكيس البلاستيك و اتنطط زى القرد و انت تقل فى الوزن .. بس قليت ايه ؟ هو ده السؤال .. قليت مياه يا معلم .. يعنى بمجرد انك تشرب كوبايتين مياه تانى كل ده هيرجع
العرق مش دليل على حرق الدهون .. حرق الدهون عن طريقة الكارديو و قلت كتير قبل كدة

24- مفيش الم .. مفيش زيادة عضلية .. No Pain No Gain

مثل معروف اوى فى جميع انحاء العالم .. ناس كتير فاكرة انه لو مخرجتش من التمرين مكسر و جسمك كله واجعك يبقى كدة مجهودك راح على الفاضى و مفيش نتيجة من اللى عملته و لازم المرة الجاية تشد على نفسك شوية

الحقيقة ان الالم ملوش علاقة بنمو العضلة او لأ .. طبيعى لو لسة مبتدىء فى اول اسبوع بيبقى فيه الم فى العضلة و بعد كدة الجسم بيتأقلم عللى بتعمله و الألم بيقل و الى حد ما بيختفى
و بعد كدة احيانا لما بتلعب تمرينة جديدة او بتشد على نفسك شوية فى التمرين العضلة بتوجعك يومين بعديها ولا حاجة وجع بسيط جدا و ده طبيعى

لكن لو الوجع جامد .. ده بقى اللى مش طبيعى و سعادتك على وشك اصابة و ده معناه انك بتتمرن غلط مش صح علشان كدة فيه وجع بالتالى تتأكد من كل التمارين اللى بتعملها عشان متضرش نفسك

25- اعمل كارديو لما تكون عاوز تحرق دهون بس

يا سلام على الحكم .. على اساس ان فائدة الكارديو ( التمرينات الهوائية ) الوحيدة انه يحرق الدهون ؟
الفرق الوحيد بين الكارديو فى مرحلة الكت اللى هى حرق الدهون و مرحلة البلك اللى هى الضخامة انه فى الكت هيبقى مرات اكثر و قوته عالية
ده غير طبعا نظامك فى التغذية و سعراتك اللى بتاكلها و على اساسها بتحدد انت عاوز ايه

الكارديو فوائده كتير و منها انه بيقوى عضلة القلب و الرئة و بالتالى بتحسن التنفس عندك و حرق الاكسجين و بيقلل من خطر الاصابة بأمراض القلب و الضغط

26- اسمع جسمك بيقولك تتمرن ايه

مقولة حلوة جدا والله .. كل واحد المفروض يعرف جسمه عاوز منه ايه .. كلام صحيح 100 %
بس الناس وخداه بمفهوم خاطىء
مثال بسيط .. واحد مخترع جديد عاوز يكتشف الجاذبية الارضية .. و هما مكتشفينها من تماناشر الف سنة هههههههه

يعنى ايه الكلام ده ؟ يعنى لما واحد مستنى جسمه يقوله العب ب 50 كيلو و 8 عدات احسن .. ولا العب 40 كيلو و 12 عدة ؟
ده اللى مينفعش تعمله
دلوقتى انت بتجرب فى حاجات العلم خلاص اثبتها من زمان .. العلم قال انه كل ما يتقدم مستواك فى التدريب كل ما العضلة هتكبر اكثر .. سواء كان عن طريقة تمرينات جديدة او اوزان اتقل او اسلوب جديد او غيره
ديه مش حاجة انت محتاج تكتشفها و بالتالى تقعد تجرب على نفسك لحد ما توصل لنفس النتيجة اللى العلم اثبتها

27- جوع نفسك و كل تفاحة و خيارة فى اليوم و انت تحرق الدهون

والله حضرتك لما تجوع نفسك هتخس فى الوزن اه .. بس هيبقى كله عضلات لان جسمك علشان ميغماش عليك من قلة الاكل محتاج اى مصدر للطاقة و مفيش اسهل من تكسير بروتين العضلة
و مجرد انك ترجع لاكلك الطبيعى هتزيد دهون بالعبيط .. لان الميتابوليزم ( حالة حرق السعرات ) فى جسمك ضعفت و بقت بطيئة
و جسمك هيحزن دهون علشان لو حضرتك ناويت تمنع الاكل تانى يلاقى حاجة ياخد منها سعرات

28- اوعى تاكل صفار البيض ده مضر جدا

تخش الجيم تلاقى اتخن تخين ماسكك من قفاك و بيقولك ( كخ يا بابا .. كخ يا حبيبى .. اوعى تاكل الصفار ده وحش ياى متقربش منه ) و اللى متعرفوش بقى ان فيتامينات البيضة a, d, e موجودين فى الصفار
ده غير الحديد و المنجنيز و الكالسيوم و الفسفور اللى بنسبة اكبر من بياض البيض

السبب الوحيد اللى بيخلى الناس ترمى صفار البيض هو نسبة الكوليسترول العالية اللى فيه
و مع ذلك الدراسات اثبتت ان الجسم مش بيتمص النسبة العالية ديه كاملة بالتالى مفيش مشكلة منه !!
و مش 3 بيضات ولا 6 فى اليوم هما اللى هيقتلوك و يعملولك تصلب شرايين

29- متاكلش قبل ما تنام بدل ما تتخن و تبقى زى العجل

برده ناس كتير بتقولك تجنب الوجبات التقيلة قبل النوم .. و اللى يقولك ( بعد الساعة 8 بالليل متاكش حاجة ) و منهم دكاترة .. اخر تخلف يعنى .. و الحجة انك و انت نايم مبتحرقش سعرات حرارية

الحقيقة انك بتحرق سعرات حرارية على مدار 8 ساعات النوم اكثر من السعرات اللى بتحرقها و انت قاعد 3 ساعات
يعنى انت عاوز تمنع الاكل و انت نايم و جسمك محتاج اى عنصر غذائى عشان يساعد فى استشفاء عضلتك و تصحى فايق .. و مش عاوز تمنعه و انت قاعدلى بتتفرج على فيلم مثلا ؟ ايه النصاحة ديه

سعراتك الحرارية هتقسمها على مدار اليوم بنسب متساوية .. تاكل بالليل .. الصبح .. بعد الضهر .. انت حر
ده فيه ناس متقدمة بيصحوا من النوم بالليل عشان ياكول و يرجعوا يناموا تانى .. ده يبين اهمية الاكل بالليل

30- عاوز معلومة صح .. اسأل الواد الجتة اللى هناك ده

اخر اشاعة و اهم واحدة فيهم نظرا للمعتقدات اللى الناس كلها فكراها ان ( اى حد جسمه حلو و متقسم و معاه بطولات او لأ .. يبقى ده اوتوماتيك يخليه خبرة و جامد .. و اى حد جسمه طبيعى و بسيط .. يقولك ده ولا ليه فى الكوسة )

اللى انت متعرفوش .. الناس الجتت و اللى تلاقى دراعه 50 سم و متقسم و متشرخ .. ده بيبقى بالوراثة
و اللى ضهره عريض .. و اللى صدره اكبر من واحد بيلعب بقاله 10 سنين .. كل الكلام ده وراثة
و هو زوده بالتغذية و التمرين .. و حبة منشطات تنفخه زيادة
و تروح تسأله بقى على انه الواد الفاهم ابو معلومات جامدة
و للاسف . تلاقيه هو نفسه مش عارف وصل للحاجة ديه ازاى

يا اما راح للكابتن بتاعه و هو اللى خلاه يلعب .. يا اما زى الحمار قعد يعمل اى حاجة و باللى بيضربه جسمه زاد و فرحان بنفسه

الخبرة مش بالشكل .. و لو كانت بالشكل يبقى ليه كباتن الجيم ( بما ان عندهم معلومات ) بيضربوا منشطات على الفاضى و المليان و هما اصلا مبيخشوش بطولات و نافخ نفسه على الفاضى ؟ معظمهم طبعا فيه ناس محترمة و فاهمة

ليه لما بتروح لكابتن الجيم بتاعك بيدخلك تمرينة 3 ساعات و يقولك كدة مفيد ؟ ( اهو مش فاهم اصلا مفيد ليه و ازاى .. جاب شهادة و خلاص و فتح جيم علشان ياكل عيش )

لو الخبرة بالشكل .. كان كل واحد ضربله كورس ديكا و تستو على كام حباية انابول بقى مدرب منتخب مصر

و كدة يكون الموضوع خلص و اتمنى انه ينال اعجابكم و اتمنى انى اكون افاتدكم

و بالتوفيق للجميع

» اهمية الكربوهيدرات للاعب كمال الاجسام
» اضرار التدخين (خاصة لاعبى كمال الاجسام)
» نظام غذائى جيد لممارسى كمال الاجسام ومناسب لكافة المستويات المادية
» الجزء الثانى من افلام ديزنى الشهيرة ولكن هذه المرة برابط مباشر
» حصريا فيلم حورية البحر الجزء الثانى برابط مباشر وبحجم 200MB وكمان بحقوق احلى منتدى