موضوع إمتحانات القدرات لجامعه السياحه والفنادق

أهلا وسهلا جميع أعضاء منتدى إيجى نت و زوار منتدى إيحى نت.
أنا حسيت إن الموضوع ده مهم بالنسبه للناس اللى عايزه تخش سياحه وفنادق وفاتها إمتحان الخبرات اللى إتعمل بعد إمتحان الثانويه العامه مباشره واللى إنتهى فى يوم 24/7/2013 طبعا فى ناس كتير
فتها الإمتحان و إفتكرت إنها راحت عليهم إسمعو منى الكلام ده مظبوت و إن شاء الله مفيش حاجه



أولا جامعات سياحه وفنادق السنه دى تقبل من مرحله أولى 81% ومرحله تانيه 70% بحد أدنى و مرحله ثالثه 248 درجه يعنى فى حدود 58% بس لازم تكون درجه المجموع فى الإنجليزى بس مش أقل من 70% بحد أدنى يعنى إن شاء الله مضمونه لناس كتير و أنا لما بقول جامعه يعنى جامعه مش بفلوس حكومه من غير ولا مليم غير مصاريف التقديم والجامعه بس مفيش فلوس زى 3000 جنيه ولا 5000 جنيه ولا الشغل ده لأن ده فى الجامعات الخاصه والمعاهد واللى أنا بتكلم عليه دى جامعه حكوميه يعنى مش خاصه و ده علشان أريح الناس اللى عايزه تفهم.



ثانيا بالنسبه لإمتحان القدرات هو فات ميعاده دلوقتى وأنا علشان أعرف إيه الحل لفيت لفه طويله جدا وعرفت منها من مصدر مؤكد منه بإذن الله إن فى إستماره هتروح تاخدها من مكتب التنسيق اللى فى جامعه القاهره بس الكلام ده بعد ما نتيجه المرحله الثانيه تطلع وبعد كده هتروح تمتحن فى جامعه حلوان للسياحه وفنادق اللى هى مش فى جامعه حلوان اللى إحنا عرفنها دى فى السيده زينب وهتمشى شويه كده لحد ما تلاقيها واللى بسأل ميتوهش وإن شاء الله هتوصل وبعد ما تمتحن هتقدم فى التنسيق بتاع المرحله الثاثه لو مقدمتش واللى فيه الخير ربنا يقدمه بإذن الله.



بالنسبه للإمتحان بتاع القدرات ده عباره عن أسئله عامه مش أكتر وأسئله روتينيه زى إسمك إيه عايز تخش الجامعه ليه إيه اللى إنت حابه فيها والكلام ده بس فى حاجه فى ناس قالت إنه هيسألك بس بالإنجليزى وفى ناس بتقول بالعربى على العموم لازم يكون الإنجليزى بتاعك حلو ولو بنسبه 70%.


أنا كده خلصت كل اللى الناس بتسأل عليه وأنا والله وفرت على اللى كان عايز يعرف مشوار كبير جدا و والله الكلام ده أنا سائل بنفسى عليه النهار ده بتاريخ 31/7/2013 وقالولى كل اللى أنا كاتبه ده والله على ما أقول شهيد وسألت فى الجامعه نفسها علشان محدش يقول أنا سألت أى حد و أتمنى إنى أكون أفدت ولو بـواحد فى الميه و أنا أتمنى إن الموضوع يتثبت ولو لفتره معينه لحد ما الناس تعرف وبعدين يتشال علشان الموضوع ده فى غايه الأهميه شكرا.